Novas

O vicepresidente da Xunta, Alfonso Rueda, acompañado pola directora da Escola Galega de Administración Pública, Sonia Rodríguez-Campos, presidiu este mércores a homenaxe a Antonio Fraguas na tradicional celebración do Día das Letras Galegas feita pola Escola Galega de Administración Pública (EGAP). Alfonso Rueda resaltou o traballo de Antonio Fraguas por e para Galicia, poñendo o acento no seu coñecemento sobre a cultura, as tradicións e o folclore galego, e tamén na súa calidade humana.

A Real Academia Galega dedícalle o Día das Letras Galegas de 2019 ao escritor, historiador e antropólogo Antón Fraguas Fraguas (1905-1999). A EGAP, como institución pública galega, súmase á homenaxe deste insigne escritor en lingua galega organizando un acto literario, seguido da inauguración dunha mostra de arte, así como dunha viaxe de interese cultural.

A Escola Galega de Administración Pública, xunto coa Asociación Galega de Arte e Cultura, abre o prazo de solicitude para participar na Mostra de arte das Letras Galegas do ano 2019. Poderá participar o persoal empregado público ao servizo da Administración xeral da Comunidade Autónoma de Galicia e das entidades públicas instrumentais do sector público autonómico de Galicia. 

A Escola Galega de Administración Pública convoca no DOG do 12 de marzo as subvencións, en réxime de concorrencia competitiva e en réxime de concorrencia non competitiva, destinadas ao financiamento de plans de formación das entidades locais de Galicia para o ano 2019, no marco do Acordo de formación para o emprego das administracións públicas.

A Escola Galega de Administración Pública convoca unha bolsa de formación destinada a persoas que remataran a titulación de licenciatura ou grao en Socioloxía ou Ciencias Políticas con posterioridade a xaneiro de 2012.