Transparencia

Servizos da EGAP

Estrutura orgánica:

A Dirección ostenta a representación ordinaria da Escola e dela dependen a Secretaría Xeral e a Xefatura de Estudos. Baixo o primeiro destes departamentos atópanse o Servizo Económico-Administrativo e a Unidade de Investigación, Avaliación e Calidade; mentres que da Xefatura de Estudos dependen o Servizo de Programación das Actividades de Formación, o Servizo de Xestión das Actividades de Formación e o Servizo de Estudos e Publicacións. /div>

• Formación en lingua galega. A Escola asume os cursos medio e superior de linguaxe administrativa galega das tres Administracións (autonómica, local e de xustiza) e convoca cursos do nivel medio en teleformación.
• Formación en linguas estranxeiras: A EGAP aposta pola ensinanza de linguas estranxeiras incluíndo cursos de portugués, inglés, francés, alemán, chino, ruso e árabe.
• Formación en tecnoloxías da información e da comunicación (TIC). A EGAP puxo en marcha en 2011 un ambicioso plan, dentro da “Axenda dixital 2014.gal”, relacionado coa formación en novas tecnoloxías, que permitirá aos empregados públicos galegos o dominio do paquete ofimático.
• Aposta pola teleformación. A EGAP leva varios anos incrementando progresivamente a porcentaxe de actividades en teleformación, un tipo de ensinanza que permite reducir custos e fai posible a conciliación da vida familiar e laboral. A Escola está moi preto do obxectivo marcado no “Plan Estratéxico de Galicia 2010-2014” de ofrecer o 60% das prazas nesta modalidade.
• Formación práctica. Todos os cursos da EGAP inclúen unha porcentaxe mínima do 25% de horas prácticas, o que garante a transferencia efectiva dos coñecementos ao posto de traballo.
• Potenciación da formación para mandos intermedios. A Escola ofrece cursos de perfeccionamento de xefes de sección e negociado. Así mesmo, canto ao Diploma de directivo ou directiva, en 2011 aprobouse un Decreto (172/2011, do 4 de agosto) que estende a posibilidade de participar neste curso ao persoal laboral, así como ao persoal ao servizo das entidades locais, neste último caso con contidos específicos.
• A EGAP como centro de información e debate. A EGAP mantén o seu papel como centro de información e debate, mediante a organización de actividades de divulgación -xornadas, congresos, conferencias e seminarios- dedicadas a temas de máxima actualidade.
• Edición de publicacións periódicas. A Escola edita dúas revistas de carácter científico: a REGAP, de carácter xurírico-administrativo, e Administración&Cidadanía, en materia de socioloxía e ciencias políticas. O acceso a elas é libre e gratuíto a través da páxina web da Escola. Así mesmo, edítanse obras monográficas sobre distintas materias relacionadas coa Administración pública.
• Calidade. A EGAP traballa en diversas iniciativas orientadas a mellorar a súa xestión e os servizos que presta aos usuarios baseándose nalgúns dos sistemas de xestión da calidade de maior relevancia como son a homologación da autoavaliación da xestión da EGAP segundo o Modelo EFQM de Excelencia, o proxecto de “Implantación dun Sistema de Xestión da Calidade segundo a norma UNE-EN ISO” e a elaboración dunha “Carta de Servizos da EGAP de nivel auditado”.