ADMINISTRACIÓN & CIDADANÍA

Administración & Cidadanía é a publicación seriada máis salientable e un dos principais proxectos de fomento e difusión da investigación da Escola Galega de Administración Pública.

Nacida en 2006, Administración & Cidadanía pretende ofrecer un novo enfoque sobre a realidade organizativa e xerencial da Administración pública e achegar novas perspectivas ao estudo dos procesos de intervención pública e do seu impacto desde as perspectivas económica, xurídica, politolóxica e sociolóxica.

Ao adoptar unha estratexia transdisciplinaria, Administración e Cidadanía desexa contribuír a perfeccionar a acción de goberno, a mellorar a xestión pública e, en consecuencia, a enriquecer a actividade administrativa e a refinar o seu servizo á comunidade. Xa que logo, as persoas con responsabilidades políticas, os cadros directivos e os cadros de persoal públicos, e todas aquelas persoas pertencentes ao ámbito académico preocupadas por modernizar e mellorar a actuación do sector público, por reforzar o seu encaixe na sociedade e facilitar o diálogo entre a cidadanía e mais a Administración, sitúanse no centro de atención desta publicación.